Avropa İttifaqı (Aİ) bu ilin sonunda təqdim edilməsi planlaşdırılan yeni viza strategiyası çərçivəsində üçüncü ölkələrə qarşı daha sərt tədbirlər hazırlayır.
Yeniera.az xəbər verir ki, bu barədə “Euractiv”portalı Avropa Komissiyasının layihəsinə istinadən məlumat yayıb.
Sənədə əsasən, vizaların verilməsi miqrasiya üzrə əməkdaşlığın səviyyəsi ilə daha sıx bağlı olacaq. Portal yazır ki, Avropa Komissiyası münasibətləri əhəmiyyətli dərəcədə pisləşən ölkələrin vətəndaşları üçün vizaları dayandırmaq və ya ləğv etmək hüququna malik olacaq.
Layihə həmçinin etibarlı səyahətçilər adlanan şəxslər üçün 10 illik çoxdəfəlik Şengen vizalarının tətbiqini və Brüsselə zəruri hallarda onları daha tez dayandırmağa və ya ləğv etməyə imkan verəcək viza azadlığına yenidən baxılması üçün yeni sistemin yaradılmasını nəzərdə tutur.
2022-ci il sentyabrın 9-da Aİ-yə üzv ölkələr Rusiya ilə viza rejiminin sadələşdirilməsi sazişinin tamamilə dayandırılması barədə qərarı təsdiqləyiblər. Bir sıra Avropa mediası bundan əvvəl xəbər vermişdi ki, Avropa Komissiyası Rusiyaya qarşı yeni sanksiyalar paketinin bir hissəsi olaraq rusların viza almasını çətinləşdirmək niyyətindədir.
Daha əvvəl Rusiya Xarici İşlər Nazirliyinin sözçüsü Mariya Zaxarova Avropa İttifaqının yaratdığı viza məhdudiyyətlərinin tətbiqi ideyasını riyakarlığın, ikili standartların və ən əsası qanuna hörmətsizliyin daha bir nümunəsi adlandırıb.
Yeganə