Yaponiyada ayı hücumlarının rekord həddə çatmasından sonra son bir ildə 14 mindən çox ayı öldürülüb.
Yeniera.az xəbər verir ki, mütəxəssislər genişmiqyaslı ovun təhlükə altında olan növlər üçün ciddi risk yaratdığını və problemin kökündən həll edilmədiyini bildirirlər.
Ötən il ölkədə 230-dan çox insan ayı hücumuna məruz qalıb, 13 nəfər həyatını itirib. Bundan sonra hökumət ayıların ovlanması qaydalarını yumşaldıb və müxtəlif bölgələrdə tələlər qurulub. Nəticədə təxminən 12 min Asiya qara ayısı və 2 min qəhvəyi ayı öldürülüb.
Lakin ayı hücumları davam edir. Yeni ov mövsümünün başlanmasından bəri ən azı doqquz bölgədə 35-dən çox hücum qeydə alınıb, 6 nəfər ölüb. Bəzi ərazilərdə ayıların yaşayış məntəqələrində görünməsi səbəbindən məktəblərdə dərslər dayandırılıb.
Ayıların yaşayış məntəqələrinə enməsinin əsas səbəbləri arasında meşələrdə qida çatışmazlığı, iqlim dəyişikliyi və kənd ərazilərinin boşalması göstərilir. Quraqlıq və yüksək temperatur ayıların əsas qida mənbəyi olan palıd və fıstıq toxumlarının azalmasına səbəb olur.