Rusiya Prezidenti Vladimir Putin Bişkekdə keçirilən Şanxay Əməkdaşlıq Təşkilatının (ŞƏT) sammiti çərçivəsində İran Prezidenti Məsud Pezeşkianla görüşüb.
Yeniera.az xəbər verir ki, bu barədə TASS agentliyi məlumat yayıb.
Rusiya lideri iki ölkə arasındakı münasibətlərin bütün sahələrdə sabit şəkildə inkişaf etdiyini diqqətə çatdırıb:
“Bildiyiniz kimi, biz görüşmək, ünsiyyət qurmaq və məsləhətləşmələr aparmaq üçün hər bir fürsətdən istifadə edirik. Rusiya-İran dostluq əlaqələri Hərtərəfli Strateji Tərəfdaşlıq Müqaviləsinin ruhuna və mətninə uyğun olaraq bütün istiqamətlərdə sabit inkişaf edir”.
Putin, həmçinin İran xalqının öz milli mənafelərini qorumaqda göstərdiyi igidlik və dözümlülüyə heyran olduğunu vurğulayıb. O, İslam Respublikasındakı hərbi-siyasi vəziyyətə baxmayaraq, Rusiya və İranın ticarət-iqtisadi əlaqələrin dinamikasını qoruyub saxladığını və humanitar sahədə də əməkdaşlığın genişləndirilməsinə böyük önəm verdiyini bildirib.
Öz növbəsində Məsud Pezeşkian Rusiya ilə münasibətlərin strateji xarakter daşıdığını və bunun İrana ABŞ-yə müqavimət göstərməkdə kömək etdiyini qeyd edib:
“Münasibətlərimiz stratejidir… Əminik ki, bu şəkildə ABŞ-yə və onların bizə qarşı tətbiq etdiyi bütün sanksiyalara müqavimət göstərə bilərik”.
İran Prezidenti ABŞ ilə münaqişə fonunda göstərdiyi dəstəyə görə Rusiya dövlət başçısına minnətdarlığını da bildirib.