Türkiyədə uzun müddətdir müzakirə olunan iki böyük istintaq eyni gündə yeni mərhələyə keçib.
Yeniera.az xəbər verir ki, “Alihan Kuriş cinayət təşkilatı” işi keçmiş daxili işlər nazirinə qədər uzanarkən, 2020-ci ildən itkin düşən Gülistan Dokunun taleyinin açılması istiqamətində beşinci əməliyyat dalğası keçirilib.
Ankara Respublika Baş Prokurorluğunun apardığı “Alihan Kuriş çıkar amaçlı suç örgütü” istintaqı çərçivəsində Türkiyənin keçmiş daxili işlər naziri İdris Naim Şahinin ifadəsinin alınacağı bildirilib. Buna səbəb istintaqın əsas fiqurlarından olan və hazırda həbsdə saxlanılan Hilmi Tuna Kurişin xaricə qaçırılması cəhdində istifadə edilən avtomobillə Şahin arasındakı əlaqədir.
Hilmi Tuna Kuriş və Erhan Yılmaz avqustun 21-də Muğlanın Marmaris bölgəsində saxlanılıblar. Araşdırmada istifadə edilən avtomobilin 2025–2030-cu illər üçün İdris Naim Şahinin istifadəsinə verildiyi müəyyənləşdirilib. Şahinin istifadəsinə verilən daha iki avtomobil də araşdırmaya götürülüb. Keçmiş nazir isə Kuriş və Yılmazı tanımadığını, avtomobilin onun xəbəri olmadan istifadə edildiyini bildirib.
“Alihan Kuriş” işi artıq genişmiqyaslı əməliyyata çevrilib. Avqustun 13-də keçirilən ilk əməliyyatda Alihan Kuriş də daxil olmaqla 38 nəfər saxlanılıb, onlardan 32-si həbs edilib. Avqustun 25-də isə 54 şübhəli barəsində saxlanılma qərarı çıxarılıb. Məhkəməyə çıxarılan 37 nəfərdən 35-i həbs edilib. İstintaq təşkilatın əmlakı və maliyyə əlaqələri istiqamətində də davam etdirilir.
Eyni zamanda Türkiyənin illərdir cavab gözləyən ən müəmmalı işlərindən biri – Gülistan Doku dosyesində də yeni mərhələ başlayıb.
Ədliyyə naziri Akın Gürlek avqustun 29-da istintaq çərçivəsində beşinci əməliyyat dalğasının keçirildiyini və daha 10 şübhəlinin saxlanıldığını açıqlayıb. Əməliyyat Erzurum və Tunceli prokurorluqları, polis və jandarmanın koordinasiyası ilə həyata keçirilib.
Munzur Universitetinin tələbəsi Gülistan Doku 5 yanvar 2020-ci ildə Tuncelidə yoxa çıxıb. İllərlə onun intihar etmiş ola biləcəyi versiyası üzərində dayanılıb və su hövzəsində geniş axtarışlar aparılıb. Lakin 2026-cı ildə istintaqın yenidən genişləndirilməsi hadisənin tamam başqa istiqamətdə araşdırılmasına gətirib çıxarıb. Prokurorluq dosyenin sadə itkin hadisəsi olmadığı və hadisənin mütəşəkkil struktur daxilində törədildiyi istiqamətində qiymətləndirmə aparıb.
İstintaqın ən səs-küylü məqamlarından biri keçmiş Tunceli valisi Tuncay Sonelin oğlu Mustafa Türkay Sonellə bağlıdır. O, 2026-cı ilin aprelində aparılan əməliyyatdan sonra həbs edilib. Gizli şahid “Şubat” ifadəsində Gülistan Dokunun Mustafa Türkay Sonel tərəfindən silahla öldürüldüyünü irəli sürüb. Eyni ifadədə cinsi zorakılıq, hamiləlik və sonradan sübutların aradan qaldırılması ilə bağlı da ağır ittihamlar səsləndirilib. Bunlar istintaqdakı şahid iddialarıdır və məhkəmənin yekun hökmü ilə təsdiqlənmiş faktlar deyil.
İş bununla da bitməyib. İstintaq Mustafa Türkay Sonelin atası, həmin dövrdə Tuncelinin valisi olmuş Tuncay Sonelə qədər uzanıb. Gülistanın yoxa çıxmasından sonra bəzi məlumatların və sübutların silinməsi və ya gizlədilməsi ilə bağlı araşdırmalar aparılıb. Keçmiş polis əməkdaşları və başqa dövlət strukturlarında çalışmış şəxslər də dosyeyə daxil ediliblər.
Gülistanın ailəsi də əvvəlki araşdırmalarda sübutların gizlədildiyini uzun müddətdir bildirirdi. Gülistanın bacısı Aygül Doku 2026-cı ilin aprelində keçmiş polis əməkdaşı Gökhan Ertokun onlarla əlaqə saxlayaraq Gülistana aid dəlilləri silmək qarşılığında 10 min dollar aldığını söylədiyini açıqlamışdı. Bu da ailənin açıqladığı və istintaqda araşdırılan iddialardandır.
Son əməliyyatda əldə edilən texniki məlumatlar isə işi daha da mürəkkəbləşdirib. Gülistanın son görüldüyü körpü və həmin zaman intervalına aid PTS və rabitə qeydlərində yeni tapıntılar, onun yoxa çıxmasından sonra Instagram hesabına şübhəli giriş və əməliyyatlar müəyyən edilib.
Daha bir diqqətçəkən fakt sualtı axtarışlarla bağlıdır. İstintaqa görə, məhkəmə orqanlarından gizlədilmiş dalğıc dəftərindəki qeydlərlə rəsmi axtarış protokolları bir-birinə uyğun gəlmir.
Ən ciddi tapıntılardan biri isə Gülistana məxsus bəzi şəxsi əşyalarla bağlıdır. İstintaq orqanları həmin əşyaların hadisəni intihar kimi göstərən görüntü yaratmaq məqsədilə sonradan suyun altına yerləşdirilmiş ola biləcəyinə dair faktlar əldə edildiyini açıqlayıblar.
Musavat.com