Suriyada vəziyyət yenidən gərginləşib.
Yeniera.az xəbər verir ki, Türkiyə hərbçilərinin Deyr əz-Zorda fəallaşması, İsrail ordusunun Suriya ərazisindəki son hərəkətləri və Əs-Süveydada baş verən silahlı toqquşmalar bölgədə yeni hərbi eskalasiya ehtimalını gündəmə gətirib.
Yayılan məlumatlara görə, ötən ay İsrail Suriyanın şimalındakı İdlib vilayətində yerləşən hərbi bazaya zərbə endirdikdən sonra bölgədə gərginliyin yeni mərhələsi başlayıb.
Son proseslərdə Türkiyə hərbçilərinin Deyr əz-Zor vilayətində görünməsi xüsusi diqqət çəkir. Türkiyə və Suriya ordularının Əl-Məyadin yaxınlığında Fərat çayı üzərində ponton körpünün tikintisini başa çatdırdığı bildirilir.
Məlumatlara görə, bölgədə Türkiyə və Suriya hərbi bölmələrinin fəaliyyəti müşahidə olunur. Eyni zamanda Türkiyəyə məxsus pilotsuz uçuş aparatlarının uçuşlarının qeydə alındığı bildirilir.
Bununla paralel olaraq, İsrail hərbçilərinin Suriya ərazisində fəaliyyətini artırması və yaşayış məntəqələrindən birinə yenidən hücum etməsi barədə məlumatlar yayılıb.
Bu gün isə druz əhalisinin əhəmiyyətli hissəsinin yaşadığı Əs-Süveyda vilayətində yerli silahlı birləşmələrlə Suriya hökumət qüvvələri arasında toqquşmaların baş verdiyi bildirilir.
Beləliklə, eyni vaxtda üç istiqamətdə yaşanan proses – Türkiyə hərbçilərinin Deyr əz-Zorda fəallaşması, Əs-Süveydadakı silahlı qarşıdurmalar və İsrail ordusunun Suriya ərazisindəki fəaliyyəti – yaxın günlərdə Suriyaya qarşı İsrail zərbələrinin yeni dalğasının başlaya biləcəyi barədə ehtimalları gücləndirib.
Yayılan təhlillərdə İsrailin Baş naziri Benyamin Netanyahunun gələn ay keçiriləcək seçkilər ərəfəsində ölkə ətrafında yüksək gərginliyin davam etməsində siyasi marağının olduğu da irəli sürülür. Bu yanaşmaya görə, yeni hərbi qarşıdurma Netanyahunun siyasi mövqelərini yenidən gücləndirə bilər.
Musavat.com