Vəfat edən şəxsin pensiyasının sosial sığorta məbləğinin 30 faizi ailəsinə əvvəlcədən ödənilməlidir. bu barədə Milli Məclisin Əmək və sosial siyasət komitəsinin üzvü Əziz Ələkbərli komitənin iclsında çıxış zamanı deyib.
O qeyd edib ki, bəzən vəfat edən şəxsin həyat yoldaşı ərinin pensiyasını almaq üçün 10 il gözləməli olur: “Bu çox uzun müddətdir. Hesab edirəm ki, sosial sığorta məbləğinin heç olmasa 30 faizi əvvəlcədən ödənilərsə, daha məqbul olar”.
Məsələ ilə bağlı Modern.az-a danışan iqtisadçı Eldəniz Əmirov bildirib ki, şəxs dünyasını dəyişdikdən sonra onun pensiya kapitalının aqibəti ilə bağlı hazırkı vəziyyət heç də qənaətbəxş deyil.
“Sözügedən məsələdə hazırda ədalətsiz prinsip var. İnsanlar illər boyu ikili mühasibatlığın olmadığı yerdə işləyib, Pensiya Fonduna vəsait ödəyərək pensiya kapitalı formalaşdırır, amma o öldükdən sonra bunun heç bir faydası olmur. Bu pensiyanı nə onun ailəsi, nə də uşağı görə bilir. Bu hallar həddindən artıq çoxdur və pensiya sisteminə insanların güvənsizliyini yaradır”.
E. Əmirov bildirib ki, 2024-cü ildə pensiya fondunun gəlirlərinin formalaşmasında hətta dövlət büdcəsindən transfer edildi.
“Vəfat edənin pensiya kapitalından onun ailəsinə vəsait ayrılmadığı halda belə, yenə də Fondun gəlirləri xərclərini ödəyə bilmir. Bunu dövlət büdcəsindən olan milyonlarla transfer də göstərir. Belə olan halda ölən şəxsin pensiya kapitalının 30 faizinin onun ailəsinə verilməsi ilə bağlı qərar qəbul ediləcəyini bir iqtisadçı olaraq gözləmirəm”.