AMEA prezidenti İsa Həbibbəylinin XIV əsrə aid nadir Nizami Gəncəvi əlyazmasını Vatikan nümayəndə heyətinə təqdim etdiyi görüntülər sosial şəbəkələrdə geniş müzakirələrə səbəb olub.
Yeniera.az xəbər verir ki, yayılan videoda İsa Həbibbəyli qonaqlara qədim əlyazmanı nümayiş etdirərkən vərəqləri sürətlə çevirdiyi görünür.
Görüntülərdə nümayəndə heyətinin üzvlərindən birinin əlyazmaya yaxınlaşaraq vərəqlərin daha ehtiyatla çevrilməsinə işarə etdiyi, bundan sonra təqdimatın daha diqqətli şəkildə davam etdirildiyi müşahidə olunur.
Sosial şəbəkələrdə yayılan paylaşımlarda Vatikan nümayəndələrinin qədim əlyazmaların qorunması ilə bağlı həssas yanaşma nümayiş etdirdiyi və əlyazmanın daha ehtiyatla vərəqlənməsinin vacibliyini bildirdiyi iddia olunur.
Qeyd edək ki, söhbət XIV əsrə aid nadir Nizami Gəncəvi əlyazmasından gedir. Qədim əlyazmaların saxlanılması və nümayişi zamanı beynəlxalq təcrübədə onların minimum təmasla, xüsusi qaydalara uyğun şəkildə vərəqlənməsi tövsiyə olunur.
AMEA tərəfindən məsələ ilə bağlı hələlik rəsmi açıqlama verilməyib.