“Leobank”ın kredit xidməti ilə bağlı daha bir vətəndaş narazılığı səsləndirilib.
Yeniera.az Bakıvaxtı.az-a istinadən xəbər verir ki, vətəndaş müraciətdə oğlunun “Leobank”dan götürdüyü kreditin tam bağlanmasına baxmayaraq sistemdə yenidən borc və faizlərin hesablandığını iddia edib.
Onun sözlərinə görə, kredit üzrə əsas məbləğ, eləcə də hesablanmış faiz və gecikmə faizləri tam ödənilib. Buna baxmayaraq, bir müddət sonra tətbiqdə yenidən borc görünüb və həmin məbləğə əlavə faiz hesablanmağa başlanılıb.
Şikayətçi bildirib ki, məsələni aydınlaşdırmaq üçün dəfələrlə müştəri xidmətləri ilə əlaqə saxlamağa çalışsalar da, operatorlar onları yalnız WhatsApp üzərindən yazışmaya yönləndirirlər. Onun iddiasına görə, bu kanalda da problem həllini tapmır və konkret izahat verilmir.
Vətəndaş hesab edir ki, belə hallar xüsusilə gənc kredit istifadəçilərini çətin vəziyyətə salır və borcun tam bağlanmasına baxmayaraq yeni öhdəliklərin yaranması ciddi narazılıq doğurur.