Məlum olduğu kimi, ABŞ Prezidenti Donald Tramp İsraildə səfərdədir.
Amerika lideri Yaxın Şərq Sülh Sammitində iştirak edəcək.
ABŞ prezidentinin İsrailin baş naziri Benyamin Netanyahu ilə görüşündə hansı məsələləri müzakirə edəcəyi də diqqət mərkəzindədir.
Mövzu ilə bağlı fikirlərini Yeniera.az ilə bölüşən politoloq Məhəmməd Əsədullazadə bildirib ki, İsrail və HƏMAS arasında atəşkəs sammitinin keçirilməsi baş tutacaq, bundan əvvəl isə Trampın Knessetdə çıxışı gözlənilir:
“Təbii ki, tərəflər Qəzzanın gələcəyi, həmçinin HƏMAS-la bağlı məsələləri, yeni idarəetmə sisteminin qurulmasını, ABŞ hərbçilərinin müəyyən zolaqda yerləşdirilməsini, atəşkəsə nəzarət mexanizmlərinin tətbiq olunmasını müzakirə edəcəklər. Həmçinin ABŞ-İsrail arasında hərbi əməkdaşlığın inkişaf etdirilməsi də əsas danışıqlar predmeti olacaq.
Məlumdur ki, ABŞ İsrailə böyük dəstək verir, həmçinin İsrailin daxili siyasətində baş nazir Benyamin Netanyahunun müdafiəsi də müzakirə olunacaq. Çünki ona qarşı daxildə ciddi ittihamlar var. Görünür Amerika prezidenti Knesset çıxışında Netanyahuya da öz dəstəyini ifadə edəcək”.
Mikayıl Mirzəzadə